4 డిసెంబర్ 2024న సంధ్యా థియేటర్ వద్ద “పుష్ప 2” సినిమా రిలీజ్ సందర్భంగా తొక్కిసలాట జరిగింది. ఈ ఘటన పై పోలీసులు కేసు నమోదు చేసి అల్లు అర్జున్‌ను నిందితుడిగా చేర్చి అరెస్ట్ చేశారు. ఈ కేసులో అల్లు అర్జున్‌కు హైకోర్టు బెయిల్ మంజూరు చేయడంతో విడుదలయ్యారు. ఈ ఘటనపై తెలంగాణ అసెంబ్లీలో సీఎం రేవంత్ రెడ్డి మాట్లాడారు. ఈ నేపథ్యంలో, “చిరంజీవి అల్లు అర్జున్ కేసు విషయంలో తెలంగాణ సీఎం రేవంత్ రెడ్డిని విమర్శించారు” అంటూ వీడియో ఒకటి సోషల్ మీడియాలో వైరల్ అవుతోంది (ఇక్కడ, ఇక్కడ, మరియు ఇక్కడ). ఈ కథనం ద్వారా అందులో ఎంత నిజముందో చూద్దాం.
క్లెయిమ్: అల్లు అర్జున్, సంధ్యా థియేటర్ తొక్కిసలాట కేసు విషయంలో చిరంజీవి తెలంగాణ సీఎం రేవంత్ రెడ్డిని విమర్శిస్తున్న వీడియో.
ఫాక్ట్(నిజం): ఈ వీడియో 08 ఆగస్ట్ 2023న వాల్తేరు వీరయ్య సినిమా 200-రోజుల వేడుకలో, చిరంజీవి ఆంధ్రప్రదేశ్ ప్రభుత్వం మరియు టాలీవుడ్ ఫిల్మ్ ఇండస్ట్రీ మధ్య వివాదంపై మాట్లాడుతూ, ఫిల్మ్ ఇండస్ట్రీపై కాకుండా రాష్ట్ర అభివృద్ధిపై దృష్టి పెట్టాలని విమర్శించారు. ఈ వైరల్ వీడియోకు అల్లు అర్జున్ కేసుతో ఎలాంటి సంబంధం లేదు. కావున పోస్టు ద్వారా చెప్పేది తప్పు.
వైరల్ అవుతున్న వీడియోలోని కీఫ్రేమ్‌లను రివర్స్ ఇమేజ్ సెర్చ్ చేసినప్పుడు, ఈ వీడియో యొక్క పూర్తి వెర్షన్ (ఆర్కైవ్డ్ లింక్) మాకు లభించింది. ఈ వీడియో 10 ఆగస్టు 2023న YouWe Media యూట్యూబ్ ఛానెల్ “వాల్తేరు వీరయ్య 200-రోజుల సెలబ్రేషన్లలో మెగాస్టార్ చిరంజీవి యొక్క పూర్తి ప్రసంగం” అనే శీర్షికతో ప్రచురించబడింది.
ఈ కార్యక్రమానికి సంబంధించిన మరింత సమాచారం కోసం తగ్గిన కీవర్డ్స్ ఉపయోగించి వెతకగా, ఆగస్టు 2023లో ప్రచురించబడిన పలు వార్త కథనాలు (ఇక్కడ, ఇక్కడ, మరియు ఇక్కడ) (ఆర్కైవ్డ్ లింక్ ఇక్కడ, ఇక్కడ, మరియు ఇక్కడ) మాకు లభించాయి. ఈ కథనాలు ప్రకారం, 08 ఆగస్ట్ 2023న వాల్తేరు వీరయ్య సినిమా 200-రోజుల వేడుకలో, చిరంజీవి ఆంధ్రప్రదేశ్ ప్రభుత్వం మరియు టాలీవుడ్ ఫిల్మ్ ఇండస్ట్రీ మధ్య వివాదంపై మాట్లాడుతూ, ఫిల్మ్ ఇండస్ట్రీపై కాకుండా రాష్ట్ర అభివృద్ధిపై దృష్టి పెట్టాలని విమర్శించారు. ఈ వైరల్ వీడియోకు, ప్రస్తుతం జరుగుతున్న అల్లు అర్జున్ కేసుతో ఎలాంటి సంబంధం లేదని స్పష్టం అయింది.
చివరిగా, అల్లు అర్జున్ కేసు విషయంలో చిరంజీవి తెలంగాణ సీఎం రేవంత్ రెడ్డిని విమర్శించారు అంటూ 2023 నాటి వీడియోను షేర్ చేస్తున్నారు.
