బొంబాయిలో బుర్కా వేసుకొని బజారులో తిరుగుతున్న భజరంగ్ దళ్ కార్యకర్తను పోలీసులు అదుపులోకి తీసుకోని కౌన్సలింగ్ ఇచ్చి పంపించారంటూ ఒక వీడియో సోషల్ మీడియాలో విస్తృతంగా షేర్ అవుతోంది. ఈ కథనం ద్వారా ఆ వీడియోకు సంబంధించి నిజమేంటో చూద్దాం.
క్లెయిమ్: బొంబాయిలో బుర్కా వేసుకొని బజారులో తిరుగుతున్న భజరంగ్ దళ్ కార్యకర్తను పోలీసులు అదుపులోకి తీసుకున్న వీడియో.
ఫాక్ట్(నిజం): ఈ ఘటన పాకిస్తాన్‌లోని లాహోర్‌లో జరిగింది. ఒక వ్యక్తి బురఖా ధరించి పాకిస్తాన్ మాజీ ప్రధాని ఇమ్రాన్ ఖాన్ ఇంట్లోకి ప్రవేశించగా పోలీసులు అతనిని అరెస్ట్ చేసారు. ఈ వీడియోతో ముంబైకి గానీ, భజరంగ్ దళ్ కి గానీ ఎటువంటి సంబంధం లేదు. కావున పోస్టు ద్వారా చెప్పేది తప్పు.
ఈ వీడియోలో కనిపిస్తున్నట్టు ఒక వ్యక్తి బురఖా ధరించి పోలీసులకు దొరికిపోయిన విషయం నిజమే అయినప్పటికీ ఈ ఘటన పాకిస్తాన్‌లో జరిగింది. ఈ వీడియోకు సంబంధించిన స్క్రీన్ షాట్స్‌ను రివర్స్ ఇమేజ్ సెర్చ్ చేయగా ఒక పాకిస్తానీ జర్నలిస్ట్ ఈ వీడియోను షేర్ చేసిన ట్వీట్ మాకు కనిపించింది.
ఈ బురఖా ధరించిన వ్యక్తిని పాక్ మాజీ ప్రధాని ఇమ్రాన్ ఖాన్ ఇంటి దగ్గర అరెస్ట్ చేసినట్టు ఆ జర్నలిస్ట్ తెలిపింది. ఆ వ్యక్తి ఎందుకు బురఖాలో ఇమ్రాన్ ఖాన్ ఇంట్లోకి ప్రవేశించాడో ఇంకా తెలియరాలేదని ఈ వీడియోను రిపోర్ట్ చేసిన వార్తా కథనాలు పేర్కొన్నాయి (ఇక్కడ మరియు ఇక్కడ).
ఆలాగే వీడియోలో ‘Capital City Police’ అని ఒక లోగో కనిపిస్తుంది. దీని ఆధారంగా వెతకగా ఈ లోగో లాహోర్ పోలీసులదని తెలిసింది. దీన్నిబట్టి పోస్టులో చెప్తున్నట్టు ఈ ఘటన ముంబైలో జరగలేదని మరియు వీడియోలోని వ్యక్తి భజరంగ్ దళ్ కార్యకర్త కాదని స్పష్టమవుతుంది.
చివరగా, భజరంగ్ దళ్ కార్యకర్త బురఖాలో తిరుగుతూ పోలీసులకు దొరికాడంటూ పాకిస్తాన్‌కి సంబంధించిన వీడియో షేర్ చేస్తున్నారు.
