ఇటీవల టర్కీలోని అడవుల్లో మంటలు చెలరేగి పెద్ద సంఖ్యలో చెట్లు, జంతువులూ కాలిపోతున్న నేపథ్యంలో సోషల్ మీడియాలో టర్కీలో కాలిపోతున్న అడవులకి సంబంధించిన ఫోటోలంటూ కొన్ని ఫోటోలు షేర్ చేసిన పోస్ట్ ఒకటి విస్తృతంగా షేర్ అవుతుంది. ఐతే ఈ కథనం ద్వారా ఆ ఫోటోలకు సంబంధించిన నిజమేంటో చూద్దాం.
క్లెయిమ్: టర్కీలో కాలిపోతున్న అడవులకు సంబంధించిన ఫోటోలు.
ఫాక్ట్ (నిజం): ఈ ఫోటోలలో కొన్ని టర్కీకి సంబంధించినవి కావు. మరికొన్ని గతంలో టర్కీలో వ్యాపించిన మంటలకి సంబంధించినవి. ఈ ఫొటోలకి ప్రస్తుతం టర్కీలో వ్యాపిస్తున్న మంటలకి ఎటువంటి సంబంధంలేదు. కావున పోస్టు ద్వారా చెప్పేది తప్పుదోవ పట్టించే విధంగా ఉంది.
ఫోటో 1:
2020లో టర్కీలోని ఆలివ్ తోటలలో వ్యాపించిన మంటలకి సంబంధించిన వార్తను ప్రచురించిన పలు టర్కీకి చెందిన ఆన్‌లైన్‌ వార్తా కథనాలు (ఇక్కడ, ఇక్కడ మరియు ఇక్కడ) ఇదే ఫోటోని ప్రచురించాయి. ఐతే ఈ ఫోటో 2020లో వ్యాపించిన మంటలకి సంబంధించిందని కచ్చితంగా చెప్పలేకపోయినప్పటికీ, ఈ కథనాల తేదీ బట్టి ఈ ఫోటో ప్రస్తుతం టర్కీలో వ్యాపిస్తున్న మంటలకు సంబంధించింది కాదని స్పష్టమవుతుంది.
ఫోటో 2:
ఈ ఫోటో అమెరికాలోని మోంటానా రాష్ట్రంలో ఉన్న బిట్టర్ రూట్ నేషనల్ ఫారెస్ట్‌లో 2000 సంవత్సరంలో మంటలు చెలరేగిన (ఫారెస్ట్ ఫైర్స్) ఘటనకి సంబంధించింది. ఈ ఫోటోని రివర్స్ ఇమేజ్ సెర్చ్ చేయగా ఇదే ఫోటోని 2017లో ప్రచురించిన ఒక కథనం కనిపించింది, ఈ కథనం ప్రకారం ఈ ఫోటో అమెరికాలో జరిగిన ఫారెస్ట్ ఫైర్స్‌కి సంబంధించిందని స్పష్టమవుతుంది. ఇదే ఫోటోని ప్రచురించిన కొన్ని పాత కథనాలు ఇక్కడ మరియు ఇక్కడ చూడొచ్చు.
ఫోటో 3:
ఈ ఫోటోకి సంబంధించి కచ్చితమైన సమాచారం మాకు లభించలేదు.
ఫోటో 4:
ఈ ఫోటో ఏ ఘటనకి సంబంధించిందో కచ్చితమైన సమాచారం తెలియనప్పటి ఇదే ఫోటోని 2019లో ఫారెస్ట్ ఫైర్స్ పై రాసిన ఒక కథనంలో ప్రచురించారు, దీన్నిబట్టి ఇది పాత ఫోటో అని, ఈ ఫోటోకి ఇప్పుడు టర్కీ అడవుల్లో వ్యాపిస్తున్న మంటలకి ఎటువంటి సంబంధంలేదని స్పష్టంగా అర్ధమవుతుంది.
ఫోటో 5:
టర్కీకి చెందిన ఒక ఆన్‌లైన్‌ న్యూస్ పోర్టల్ ఇదే ఫోటోని 2019 టర్కీ అడవుల్లు చెలరేగిన మంటలకు సంబంధించిన వార్తలో ప్రచురించింది. ఐతే ఈ ఫోటో ఆ మంటలకు సంబంధించిందో కాదో కచ్చితమైన సమాచారం తెలియనప్పటికీ, ప్రస్తుతం టర్కీలో వ్యాపిస్తున్న మంటలకి సంబంధించింది కాదని అర్ధం చేసుకోవచ్చు.
ఫోటో 6:
2020లో టర్కీలో వ్యాపించిన మంటలను అదుపులోకి తెచ్చిన విషయానికి సంబంధించి టర్కీ ప్రభుత్వ వెబ్సైటులో రాసిన ఒక కథనంలో ఇదే ఫోటోని ప్రచురించారు. అలాగే 2020లో ప్రచురించిన ఒక టర్కిష్ వార్తా కథనంలో కూడా ఇదే ఫోటోని ప్రచురించారు, దీన్నిబట్టి ఈ ఫోటో టర్కీలో వ్యాపించిన మంటలకు సంబంధించిందే అయినా ప్రస్తుతం వ్యాపిస్తున్న మంటలకి సంబంధించింది కాదని స్పష్టమవుతుంది.
చివరగా, సంబంధం లేని పాత ఫోటోలను ప్రస్తుతం టర్కీలో వ్యాపిస్తున్న మంటల వంటూ షేర్ చేస్తున్నారు.
