హిజాబ్ అల్లర్లలో ధైర్యంగా తన గొంతెత్తి నిలబడిన తబస్సుమ్ షేక్, పీయూసీ 2వ సంవత్సర పరీక్షల్లో 593/600 మార్కులు సాధించి స్టేట్ ఫస్ట్‌గా నిలిచింది అని చెప్తున్న పోస్ట్ ఒకటి సోషల్ మీడియాలో విస్తృతంగా షేర్ అవుతోంది. ఈ పోస్టులో తన ఫోటోను కూడా షేర్ చేసారు. ఈ కథనం ద్వారా అందులో ఎంత నిజముందో చూద్దాం.
క్లెయిమ్: హిజాబ్ అల్లర్లలో ధైర్యంగా తన గొంతెత్తి నిలబడిన తబస్సుమ్ షేక్, పీయూసీ 2వ సంవత్సర పరీక్షల్లో 593/600 మార్కులు సాధించి స్టేట్ ఫస్ట్‌గా నిలిచింది.
ఫాక్ట్(నిజం): హిజాబ్ అల్లర్లలో నిలబడింది, PUC పరీక్షల్లో మొదటి ర్యాంకు సాధించింది ఒక్కరు కాదు. ‘అల్లా-హు-అక్బర్’ అంటూ నిలబడిన అమ్మాయి ముస్కాన్ ఖాన్ కాగా, ఇప్పుడు 2nd PUCలో మొదటి ర్యాంకు సాధించింది తబస్సుమ్ షేక్. వీరిద్దరికీ సంబంధంలేదు. ముస్కాన్ ఖాన్ మాండ్యాలోని ప్రీ-యూనివర్శిటీ కాలేజీలో బీకాం రెండో సంవత్సరం చదువుతుంది. కాగా మొదటి ర్యాంకు సాధించిన తబస్సుమ్ షేక్ బెంగుళూరులో చదువుకుంది. కావున పోస్టు ద్వారా చెప్పేది తప్పుదోవ పట్టిస్తుంది.
గత నెలలో కర్ణాటకలో 2nd ప్రీ-యూనివర్శిటీ కోర్సు (పీయూసీ, ఇంటర్‌తో సమానమైనది) పరీక్ష ఫలితాలు విడుదలైయ్యాయి. ఈ ఫలితాలలో 18 ఏళ్ల తబస్సుమ్ షేక్ ఆర్ట్స్ స్ట్రీమ్‌లో టాపర్‌గా నిలిచింది. బెంగలూరులోని N.M.K.R.V PU కాలేజీలో చదివిన తబస్సుమ్ షేక్ ఈ పరీక్షలో 600కి మార్కులకు గాను 593 సాధించింది.
అంతకు ముందు హిజాబ్ వివాదం చెలరేగడం, కోర్టు హిజాబ్ బ్యాన్‌ను సమర్ధించడంతో తాను రెండు వారాలు కాలేజీకి వెళ్లలేదని, ఆ తరవాత హిజాబ్ లేకుండానే కాలేజీకి వెళ్లినట్టు తబస్సుమ్ షేక్ మీడియాతో చెప్పింది.
ఐతే తబస్సుమ్ షేక్ ఫస్ట్ ర్యాంక్ సాధించడంతో హిజాబ్ వివాదం సమయంలో ‘అల్లా-హు-అక్బర్’ అంటూ ధైర్యంగా తన గొంతెత్తి నిలబడిన అమ్మాయి తనే అని సోషల్ మీడియాలో వార్తలు షేర్ అయ్యాయి. తబస్సుమ్ షేక్ మొదటి ర్యాంకు సాధించిన వార్తను రిపోర్ట్ చేసిన చాలావరకు వార్తా కథనాలలో ‘అల్లా-హు-అక్బర్’ అంటూ నినాదాలు చేసిన అమ్మాయి ఫోటోను పబ్లిష్ చేయడంతో ఈ కన్ఫ్యూషన్ మొదలైంది (ఇక్కడ మరియు ఇక్కడ).
హిజాబ్ అల్లర్లలో ధైర్యంగా గొంతెత్తి నిలబడింది తబస్సుమ్ షేక్ కాదు:
కానీ నిజానికి ఆ వివాదంలో ‘అల్లా-హు-అక్బర్’ అంటూ నినాదాలు చేసింది తబస్సుమ్ షేక్ కాదు. పైగా ఆ ఘటన జరిగింది మాండ్యాలోని ప్రీ-యూనివర్శిటీ కాలేజీలో, తబస్సుమ్ షేక్ చదువుకున్నది బెంగుళూరులో.
మాండ్యాలోని ప్రీ-యూనివర్శిటీ కాలేజీలో బీకాం రెండో సంవత్సరం చదువుతున్న ముస్కాన్ ఖాన్ హిజాబ్ ధరించి కాలేజీకి రావడాన్ని వ్యతిరేకించిన కొందరు కాషాయ కండువాలు ధరించిన యువకులు ‘జై శ్రీరాం’ నినాదాలు చేస్తూ ఆమె వైపు రావడంతో, అప్పుడు ఆమె ‘అల్లా-హు-అక్బర్’ అంటూ వారికీ బదులు చెప్పింది.
అప్పట్లో ఈ ఘటన దేశవ్యాప్తంగా చర్చనీయాంశం అయ్యి, ముస్కాన్ ఖాన్ హిజాబ్ వివాదానికి సంబంధించి పోస్టర్ గర్ల్‌గా మారింది. వైరల్ అవుతున్న ఈ పోస్టులో షేర్ చేసింది ఆ ఘటన సమయంలో తీసిన ముస్కాన్ ఖాన్ ఫొటోనే. ఐతే హిజాబ్ వివాదం నేపథ్యంలో ముస్కాన్ ఖాన్ పరీక్షలు రాయలేదని మీడియా రిపోర్ట్ చేసింది.
హిజాబ్ వివాదంలో నిలబడిన అమ్మయికి, ఇప్పుడు మొదటి ర్యాంకు సాధించిన అమ్మాయికి ఎటువంటి సంబంధం లేదు. ‘అల్లా-హు-అక్బర్’ అంటూ నిలబడిన అమ్మాయి ముస్కాన్ ఖాన్ కాగా, ఇప్పుడు 2nd PUCలో మొదటి ర్యాంకు సాధించింది తబస్సుమ్ షేక్. ముస్కాన్ ఖాన్ మాండ్యాలోని ప్రీ-యూనివర్శిటీ కాలేజీలో బీకాం రెండో సంవత్సరం చదువుతుంది. కాగా మొదటి ర్యాంకు సాధించిన తబస్సుమ్ షేక్ బెంగుళూరులో చదువుకుంది.
చివరగా, పీయూసీ పరీక్షలో స్టేట్ ఫస్ట్‌గా సాధించిన అమ్మాయి, హిజాబ్ వివాదంలో నిలబడిన అమ్మాయి ఇద్దరూ వేరు.
