హైదరాబాద్ పాతబస్తీలో ముస్లింలు కరెంట్ బిల్లులు కట్టకుండా అధికారులను బెదిరిస్తున్నారు అంటూ ఒక వీడియో సోషల్ మీడియాలో విస్తృతంగా షేర్ అవుతోంది. ఈ కథనం ద్వారా ఆ వీడియోకు సంబంధించి నిజమేంటో చూద్దాం.
క్లెయిమ్: హైదరాబాద్ పాతబస్తీలో ముస్లింలు కరెంట్ బిల్లులు కట్టకుండా అధికారులను బెదిరిస్తున్న వీడియో.
ఫాక్ట్(నిజం): వీడియోలోని ఘటన పాకిస్తాన్‌లోని కరాచీలో జరిగింది. షహ్రీ అతౌర్ రెహమాన్‌ అనే వ్యక్తి కరెంట్ దొంగలిస్తూ అధికారులకు దొరికిపోయాడు. ఆ సందర్భంలోనే తన ఇంటికి విద్యుత్తును డిస్‌కనెక్ట్ చేస్తే చంపేస్తానని ఒక అధికారిని బెదిరించాడు. ఈ ఘటనను 2020లో పాకిస్తాన్ వార్తా సంస్థలు రిపోర్ట్ చేసాయి. ఈ వీడియోతో హైదరాబాద్ పాతబస్తీకి ఎటువంటి సంబంధం లేదు. కావున పోస్టు ద్వారా చెప్పేది తప్పు.
పోస్టులో చెప్తున్నట్టు వీడియోలో కనిపిస్తున్న ముస్లిం వ్యక్తి విద్యుత్ అధికారులను బెదిరిస్తున్న విషయం నిజమే అయినప్పటికీ, ఈ ఘటనకు పాతబస్తీతో ఎటువంటి సంబంధం లేదు. ఈ ఘటన పాకిస్తాన్‌లోని కరాచీలో జరిగింది.
ఈ వీడియోకు సంబంధించి మరింత సమాచారం కోసం వీడియో స్క్రీన్ షాట్స్‌ను రివర్స్ ఇమేజ్ సెర్చ్ చేయగా, ఈ వీడియోను 2020లో రిపోర్ట్ చేసిన పాకిస్తాన్ వార్తా కథనాలు మాకు కనిపించాయి. ఈ కథనాల ప్రకారం వీడియోలోని వ్యక్తి కరెంటు దొంగిలించినట్లు ధైర్యంగా ఒప్పుకోవడంతో పాటు అధికారిని బహిరంగంగా బెదిరించాడు.
ఈ ఘటనను రిపోర్ట్ చేసిన ఇతర వార్తా కథనాలు వీడియోలోని వ్యక్తిని కరాచీకి చెందిన షహ్రీ అతౌర్ రెహమాన్‌గా గుర్తించాయి. అతౌర్ రెహ్మాన్ విద్యుత్ దొంగిలిస్తుండగా కె-ఎలక్ట్రిక్ లిమిటెడ్ అనే పవర్ యుటిలిటీ కంపెనీ అధికారులు రెడ్‌హ్యాండెడ్‌గా పట్టుకున్నారు. విద్యుత్ చౌర్యాన్ని అంగీకరించిన అతౌర్ రెహ్మాన్ తన ఇంటికి విద్యుత్తును డిస్‌కనెక్ట్ చేస్తే చంపేస్తానని ఒక అధికారిని బెదిరించినట్లు వార్తా కథనాలు రిపోర్ట్ చేసాయి.
కె-ఎలక్ట్రిక్ లిమిటెడ్ కూడా తమ ట్విట్టర్ అకౌంట్ ద్వారా ఈ వీడియోను షేర్ చేసింది. వీడియోలో కనిపిస్తున్న వ్యక్తి విద్యుత్ చౌర్యానికి పాల్పడ్డాడంటూ ఈ వీడియోను షేర్ చేసింది. వీటన్నిటిబట్టి వీడియోకు పాతబస్తీతో ఎటువంటి సంబంధం లేదని స్పష్టమవుతుంది.
చివరగా, కరాచీలో ఒక వ్యక్తి విద్యుత్ అధికారిని బెదిరిస్తున్న పాత వీడియోను పాతబస్తీలో జరిగిన ఘటన అంటూ షేర్ చేస్తున్నారు.
