ఒక వ్యక్తి స్నానం చేస్తుంటే టీఆర్ఎస్ నాయకుడు ఒకరు నీళ్ళు పోస్తున్న ఫోటోని కొందరు సోషల్ మీడియాలో పెట్టి, దుబ్బాక ఉపఎన్నికలో ఓట్ల కోసం టీఆర్ఎస్ తిప్పలు అని షేర్ చేస్తున్నారు. దుబ్బాక ఉపఎన్నిక 03 నవంబర్ 2020 న జరగనుంది. ఆ పోస్ట్ లో ఎంతవరకు నిజముందో చూద్దాం.
క్లెయిమ్: దుబ్బాక ఉపఎన్నికలో ఓట్ల కోసం ఒక వ్యక్తి స్నానం చేస్తుంటే టీఆర్ఎస్ నాయకుడు ఒకరు నీళ్ళు పోస్తున్న ఫోటో.
ఫాక్ట్ (నిజం): పోస్ట్ చేసిన ఫోటో పాతది. అది 2018 లో తెలంగాణ అసెంబ్లీ ఎన్నికల ప్రచారంలో ఇల్లందు నియోజికవర్గంలో తీసిన ఫోటో. దుబ్బాక ఉపఎన్నికకు, ఆ ఫోటోకు ఎటువంటి సంబంధంలేదు. కావున పోస్ట్ లో చెప్పింది తప్పు.
పోస్ట్ చేసిన ఫోటోని గూగుల్ రివర్స్ ఇమేజ్ సెర్చ్ లో వెతకగా, అదే ఫోటోని అక్టోబర్ 2018 లో ‘డెక్కన్ క్రానికల్’ వారు తమ ఆర్టికల్ లో పెట్టినట్టు చూడవొచ్చు. ఆ ఫోటోలో ఉన్నది టీఆర్ఎస్ లీడర్ కోరం కనకయ్య అని, 2018 లో తెలంగాణ అసెంబ్లీ ఎన్నికల ప్రచారంలో ఇల్లందు నియోజికవర్గంలో ఆ ఫోటో తీసినట్టు తెలుస్తుంది. అయితే, ఆ ఫోటోని ‘ANI’ వారి దగ్గర నుండి తీసుకున్నట్టుగా ఆ ఫోటో కింద రాసి ఉంటుంది. ‘ANI’ వారు కూడా ఆ ఫోటోని అక్టోబర్ 2018 లోనే పోస్ట్ చేసినట్టుగా ఇక్కడ చూడవొచ్చు. ఆ ఫోటోకి సంబంధించిన వీడియోని ‘న్యూస్18 – తెలుగు’ వెబ్సైటులో చూడవొచ్చు.
చివరగా, ఒక వ్యక్తి స్నానం చేస్తుంటే టీఆర్ఎస్ నాయకుడు నీళ్ళు పోస్తున్న ఫోటో దుబ్బాక ఉపఎన్నికకు సంబంధించింది కాదు. అది 2018 లో తెలంగాణ అసెంబ్లీ ఎన్నికల ప్రచారంలో ఇల్లందు నియోజికవర్గంలో తీసిన ఫోటో.
