ఒక ప్రదేశంలో సంభవించిన క్లౌడ్ బరస్ట్‌ (cloud burst) యొక్క నిజమైన దృశ్యాలు అంటూ సోషల్ మీడియాలో ఒక వీడియో విస్తృతంగా షేర్ అవుతోంది (ఇక్కడ, ఇక్కడ, & ఇక్కడ). ఈ కథనం ద్వారా ఈ వీడియోకు సంబంధించిన నిజమేంటో చూద్దాం.
క్లెయిమ్: ఒక ప్రదేశంలో సంభవించిన క్లౌడ్ బరస్ట్‌కు (cloud burst) సంబంధించిన దృశ్యాలు.
ఫాక్ట్(నిజం): ఈ వైరల్ వీడియో నిజమైన క్లౌడ్ బరస్ట్‌ను చూపించడం లేదు. ఈ వైరల్ వీడియో ఆర్టిఫిషియల్ ఇంటెలిజెన్స్ (AI) ఉపయోగించి రూపొందించబడింది. ఈ వీడియో 05 ఆగస్టు 2025న ‘kandha_odysseys_vines’ అనే ఇన్స్టాగ్రామ్ పేజీలో షేర్ చేయబడింది. దీన్ని ‘Runwayml’ అనే AI ఉపయోగించి సృష్టించినట్లుగా ఈ ఇన్స్టాగ్రామ్ పేజీ నిర్వాహకుడు (అడ్మిన్) స్పష్టం చేశారు. కావున పోస్టు ద్వారా చెప్పేది తప్పు.
ఈ వైరల్ వీడియోను జాగ్రతగా పరిశీలిస్తే, ఈ వీడియో అసహజంగా ఉండటం మనం చూడవచ్చు. ఈ వీడియోలో ఒక వ్యక్తి అకస్మాత్తుగా కనిపించి అదృశ్యమవడం మనం చూడవచ్చు. ఆర్టిఫిషియల్ ఇంటెలిజెన్స్ (AI) ఉపయోగించి సృష్టించబడిన దృశ్యాలలో ఇటువంటి లోపాలు సహజంగానే ఉంటాయి (ఇక్కడ, ఇక్కడ). దీన్ని బట్టి ఈ వైరల్ వీడియో ఆర్టిఫిషియల్ ఇంటెలిజెన్స్ (AI) ద్వారా సృష్టించి ఉండవచ్చని తెలుస్తోంది.
తదుపరి ఈ వీడియోకు సంబంధించిన సమాచారం కోసం, వైరల్ వీడియోలోని కీఫ్రేమ్‌లను రివర్స్ ఇమేజ్ సెర్చ్ చేయగా, ఇదే వీడియోను 05 ఆగస్ట్ 2025న ‘kandha_odysseys_vines’ అనే ఇన్స్టాగ్రామ్ పేజీ షేర్ చేసినట్లు మేము కనుగొన్నాము. ఈ వీడియో వివరణలో, ఈ వీడియోను ఆర్టిఫిషియల్ ఇంటెలిజెన్స్ (AI), VFX ఉపయోగించి రూపొందించినట్లు పేర్కొన్నారు.
ఈ వైరల్ వీడియోకు సంబంధించిన మరింత సమాచారం కోసం, ఈ ఇన్స్టాగ్రామ్ పేజీ నిర్వాహకుడిని మేము సంప్రదించగా, ఈ వీడియోను ‘Runwayml’ అనే AI ఉపయోగించి సృష్టించినట్లుగా పేజీ నిర్వాహకుడు మాకు స్పష్టం చేశారు.
అలాగే, ఈ వైరల్ వీడియో AI- ఉపయోగించి తయారు చేసిందా? లేదా? అని నిర్ధారించడానికి, Hive వంటి పలు AI-జనరేటెడ్ కంటెంట్ డిటెక్టింగ్ టూల్స్ ఉపయోగించి ఈ వైరల్ వీడియోను పరిశీలించగా, ఈ వీడియో 99.6% AI- జనరేటెడ్ కావచ్చని Hive ఫలితాన్ని ఇచ్చింది. దీన్ని బట్టి ఈ వైరల్ వీడియో AI ద్వారా రూపొందించబడిందని మనం నిర్ధారించవచ్చు.
చివరగా, క్లౌడ్ బరస్ట్‌కు సంబంధించిన దృశ్యాలంటూ షేర్ అవుతున్న ఈ వీడియో AI ఉపయోగించి రూపొందించబడింది.
