ఆంధ్రప్రదేశ్ ఉప ముఖ్యమంత్రి పవన్ కళ్యాణ్ సందర్భాన్ని బట్టి మాటలు మారుస్తారని చెప్తూ ఆయన తన తండ్రి (కే. వెంకట రావు) గురించి చెప్తున్న వీడియో (ఇక్కడ, ఇక్కడ & ఇక్కడ) ఒకటి సోషల్ మీడియాలో బాగా ప్రచారంలో ఉంది. పవన్ కళ్యాణ్ గతంలో తన తండ్రి నాస్తికుడని చెప్పారంటూ కానీ ఇప్పుడు ఆయన రామభక్తుడని చెప్తున్నారంటూ ఈ వీడియోలో పేర్కొన్నారు. దీంట్లో ఎంత నిజముందో ఇప్పుడు చూద్దాం.
క్లెయిమ్: ఆంధ్రప్రదేశ్ ఉప ముఖ్యమంత్రి పవన్ కళ్యాణ్ గతంలో తన తండ్రి నాస్తికుడని చెప్పగా, ఇప్పుడు ఆయన రామభక్తుడని చెప్తున్నారు.
ఫాక్ట్: ఇవి క్లిప్ చేయబడిన వీడియోలు. పూర్తి వీడియోలు పరిశీలించగా, రెండు సందర్భాల్లోనూ పవన్ కళ్యాణ్ తన తండ్రి నాస్తికుడి నుంచి రామభక్తుడు అయ్యాడని చెప్తారు. కావున పోస్టులో చేయబడ్డ క్లెయిమ్ తప్పుదోవ పట్టించే విధంగా ఉంది.
ముందుగా వైరల్ వీడియోలో పవన్ కళ్యాణ్ తన తండ్రి నాస్తికుడని చెప్తున్న క్లిప్ యొక్క పూర్తి వీడియోని (ఆర్కైవ్) వెతకగా, ఈ వీడియో 26 జనవరి 2023న జనసేన పార్టీ అధికారిక యూట్యూబ్ ఛానెల్లో అప్లోడ్ చేసి ఉండడం గుర్తించాం. హిందూ మతం, దేవుళ్లపై జరుగుతున్న దాడులను ఖండిస్తూ పవన్ కళ్యాణ్ ఈ విధంగా అన్నారు, “….మా నాన్న ఒక హేతువాది. మా నాన్న, పెదనాన్న ఉమ్మడి కమ్యూనిస్ట్ పార్టీ సభ్యులు. మా నాన్న ఎలాంటి వాడంటే, మా నానమ్మ దీపారాధన వెలిగిస్తే, అందులో సిగరెట్ విలిగించుకొని దేవుడు లేడు, దెయ్యం లేదు అనే వ్యక్తి మా నాన్న. మా నాన్న, పెదనాన్న వాళ్ళ మీద (అరెస్ట్) వారెంట్లు ఇచ్చి, షూట్ ఎట్ సైట్ ఆర్డర్లు పెడితే మా నాన్న, పెదనాన్న అందరూ… ఒకాయన మిలిటరీకి వెళ్ళిపోయాడు, మా నాన్న అజ్ఞాతంలోకి వెళ్లిపోయి తర్వాత ఎప్పుడో పోలీస్ కానిస్టేబుల్ ఉద్యోగంలో చేరాడు. అదే మా నాన్న కమ్యూనిస్ట్ భావాలు ఏం పోగొట్టుకోలేదు కానీ, మెల్లిగా ఆయన రామ భక్తుడు అయిపోయాడు. జీవితకాలం, ఆయన బ్రతికినంత సేపు, రెండు చెంపలు కొట్టుకుంటూ ఉండేవాడు నేను (గతంలో) తప్పు చేశాను అని. అందుకని హేతువాదం అనే పేరు మీద హిందువుల మనోభావాలని గాయపరచకండి…”
దీన్ని బట్టి, పూర్తి వీడియోలో పవన్ కళ్యాణ్ తన తండ్రి నాస్తికుడి నుంచి రామ భక్తుడిగా ఎలా మారారో చెప్పడం చూడవచ్చు. ఇక వైరల్ వీడియోలోని రెండో క్లిప్ యొక్క పూర్తి వీడియో వెతకగా, ఈ వీడియో 15 మార్చ్ 2025 జనసేన అధికారిక యూట్యూబ్ ఛానెల్లో ప్రసారం చేసినట్లు గుర్తించాం. జనసేన పార్టీ 12వ ఆవిర్భావ దినోత్సవం సందర్భంగా ఆంధ్రప్రదేశ్లో గత ప్రభుత్వ పాలనలో జరిగిన దేవాలయాలపై దాడుల గురించి మాట్లాడుతూ పవన్ కళ్యాణ్ ఈ విధంగా అన్నారు, “….చిన్నప్పటి నుంచి మా ఇంట్లో రామ నామ జపం ఉండేది. మా నాన్న ఉమ్మడి కమ్యూనిస్ట్ పార్టీ సభ్యుడు. టీనేజ్‌లో ఆయన నాస్తికుడు. ఆయనకి ఎలా మారిందో మనసు తెలియదు కానీ నేను పుట్టేటప్పటికి విపరీతమైన రామభక్తుడు అయిపోయాడు. మా ఇంట్లో ఎప్పుడో రామనామమే ఉండేది. నాకు జబ్బు వచ్చినా మా నాన్న రామనామమే చెప్పేవాడు. అలాంటి రామనామం జపించే మాకు రాముడి విగ్రహం తల నరికిస్తే కోపం రాకూడదు అంటారేంటి మీరు...”
ఈ వీడియోలో కూడా పవన్ కళ్యాణ్ తన తండ్రి నాస్తికుడి నుంచి రామ భక్తుడిగా ఎలా మారారో చెప్తున్నారని స్పష్టమవుతుంది. అయితే ఈ రెండు వీడియోలని క్లిప్ చేసి పవన్ కళ్యాణ్ తన తండ్రి నమ్మకాల గురించి మాట మారుస్తున్నారని అర్థం వచ్చేలా వైరల్ వీడియోని రూపొందించి ప్రచారం చేస్తున్నారు. అలాగే, తన తండ్రి నాస్తికుడి నుంచి రామభక్తుడిగా మారడానికి తన అన్నయ్య చిరంజీవి పాత్ర ఉందని ఏప్రిల్ 2020లో కూడా పవన్ కళ్యాణ్ ట్వీట్ (ఆర్కైవ్) చేశారు.
చివరిగా, క్లిప్ చేసిన వీడియోలని షేర్ చేస్తూ తన తండ్రి నమ్మకాలపైన పవన్ కళ్యాణ్ సందర్భాన్ని బట్టి మాటలు మారుస్తున్నారని తప్పుడు ప్రచారం జరుగుతుంది.
