ಮಹಾರಾಷ್ಟ್ರದಲ್ಲಿ ನಡೆದ ಎತ್ತಿನಗಾಡಿ ಓಟದ ದೃಶ್ಯಗಳನ್ನು ಬಿಹಾರದಲ್ಲಿ ರಾಹುಲ್ ಗಾಂಧಿಯವರ ‘ಮತದಾರ ಅಧಿಕಾರ ಯಾತ್ರೆ’ ಎಂದು ತಪ್ಪಾಗಿ ಹಂಚಿಕೊಳ್ಳಲಾಗಿದೆ

ಆಗಸ್ಟ್ 17, 2025 ರಂದು, ಕಾಂಗ್ರೆಸ್ ನಾಯಕ ಮತ್ತು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರು ಬಿಹಾರದ ಸಸಾರಾಮ್‌ನಲ್ಲಿ ‘ಮತದಾರ ಅಧಿಕಾರ ಯಾತ್ರೆ‘ಯನ್ನು ನಡೆಸಿದ್ದರು. ಅಲ್ಲಿ ರಾಜ್ಯದ 20 ಕ್ಕೂ ಹೆಚ್ಚು ಜಿಲ್ಲೆಗಳಲ್ಲಿ 1,300 ಕಿ.ಮೀ.ಗೂ ಹೆಚ್ಚು ದೂರವನ್ನು ಕ್ರಮಿಸುವ ಮೂಲಕ 16 ದಿನಗಳ ಮೆರವಣಿಗೆ ಇದಾಗಿತ್ತು. ಬಿಹಾರದಲ್ಲಿ ಚುನಾವಣಾ ಆಯೋಗದ ವಿಶೇಷ ತೀವ್ರ ಪರಿಷ್ಕರಣೆ (SIR) ಗೆ ECI ಮತ್ತು INDIA ಬ್ಲಾಕ್‌ನ ವಿರೋಧದ ವಿರುದ್ಧ ಕಾಂಗ್ರೆಸ್‌ನ “ಮತ ಚೋರಿ” ಆರೋಪಗಳ ಹಿನ್ನೆಲೆಯಲ್ಲಿ ಈ ಮೆರವಣಿಗೆಯನ್ನು ಪ್ರಾರಂಭಿಸಲಾಯಿತು. ಸೆಪ್ಟೆಂಬರ್ 01, 2025 ರಂದು ಪಾಟ್ನಾದ ಗಾಂಧಿ ಮೈದಾನದಲ್ಲಿ ನಡೆಯುವ ರಾಲಿಯ ಜೊತೆಗೆ ಈ ಅಭಿಯಾನವು ಮುಕ್ತಾಯಗೊಳ್ಳಲಿದೆ (ಇಲ್ಲಿ, ಇಲ್ಲಿ ಮತ್ತು ಇಲ್ಲಿ).

ಈ ಮಧ್ಯೆ, ಭಾರಿ ಜನಸಮೂಹವನ್ನು ತೋರಿಸುವ ವೀಡಿಯೊವನ್ನು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದೆ.  ಇದು ರಾಹುಲ್ ಗಾಂಧಿಯವರ ಬಿಹಾರದಲ್ಲಿ ‘ಮತದಾರ ಅಧಿಕಾರ ಯಾತ್ರೆ’ಯ ಇತ್ತೀಚಿನ ದೃಶ್ಯಗಳನ್ನು ತೋರಿಸುತ್ತದೆ ಎಂದು ಹೇಳಲಾಗುತ್ತಿದೆ (ಇಲ್ಲಿ). ಹಾಗಾದರೆ ಈ ಪೋಸ್ಟ್ ನಲ್ಲಿ ಮಾಡಲಾದ ಕ್ಲೇಮ್ ಅನ್ನು ಪರಿಶೀಲಿಸೋಣ. 

ಕ್ಲೇಮ್: ಆಗಸ್ಟ್ 2025 ರಲ್ಲಿ ಬಿಹಾರದಲ್ಲಿ ನಡೆದ ರಾಹುಲ್ ಗಾಂಧಿಯವರ ‘ಮತದಾರ ಅಧಿಕಾರ ಯಾತ್ರೆ’ ರಾಲಿಯಲ್ಲಿ ಭಾರಿ ಜನಸಮೂಹ ಸೇರಿರುವುದನ್ನು ಈ ವೀಡಿಯೊ ತೋರಿಸುತ್ತದೆ.

ಫ್ಯಾಕ್ಟ್: ಭಾರೀ ಜನಸಂದಣಿಯನ್ನು ತೋರಿಸುವ ವೈರಲ್ ವೀಡಿಯೊ ಬಿಹಾರದಲ್ಲಿ ರಾಹುಲ್ ಗಾಂಧಿಯವರ ‘ಮತದಾರ ಅಧಿಕಾರ ಯಾತ್ರೆ’ ಅಥವಾ ಅವರ ಯಾವುದೇ ಸಭೆಗಳಿಗೆ ಸಂಬಂಧಿಸಿಲ್ಲ. ಇದು ಮಹಾರಾಷ್ಟ್ರದ ಸತಾರಾದ ಪೆಡ್ಗಾಂವ್‌ನಲ್ಲಿರುವ ಹಿಂದ್‌ಕೇಸರಿ ಮೈದಾನದಲ್ಲಿ ಆಯೋಜಿಸಲಾದ ಎತ್ತಿನ ಗಾಡಿ ಓಟದ ಚಿತ್ರ. ಆದ್ದರಿಂದ ಪೋಸ್ಟ್‌ನಲ್ಲಿ ಮಾಡಲಾದ ಕ್ಲೇಮ್ ಸುಳ್ಳು.

ವೈರಲ್ ವೀಡಿಯೊದ ವಿವರಗಳನ್ನು ಪರಿಶೀಲಿಸಲು, ನಾವು ಕ್ಲಿಪ್‌ನಿಂದ ಕೀಫ್ರೇಮ್‌ಗಳನ್ನು ಬಳಸಿಕೊಂಡು ಗೂಗಲ್ನಲ್ಲಿ ರಿವರ್ಸ್ ಇಮೇಜ್ ಹುಡುಕಾಟವನ್ನು ನಡೆಸಿದ್ದೇವೆ. ಈ ಮೂಲಕ 23 ಜೂನ್ 2025 ರಂದು ಯೂಟ್ಯೂಬ್ ನಲ್ಲಿ ಅಪ್‌ಲೋಡ್ ಮಾಡಲಾದ ಇದೇ ರೀತಿಯ ವೀಡಿಯೊಗೆ ನಮ್ಮನ್ನು ಕರೆದೊಯ್ಯಿತು. ವೀಡಿಯೊವನ್ನು #Pedgaon #bullockcart #race #Field #pedgav #bailgada #shariyat #Maharashtra #bakasur #trending #gadamalak ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಳ್ಳಲಾಗಿದೆ. ವೀಡಿಯೊ ಮಹಾರಾಷ್ಟ್ರದಲ್ಲಿ ನಡೆದ ಎತ್ತಿನ ಗಾಡಿ ಓಟದ ಚಿತ್ರ ಎಂದು ಕ್ಯಾಪ್ಶನ್ ನಲ್ಲಿ ಬರೆಯಲಾಗಿದೆ. ಇದರಿಂದ, ವೈರಲ್ ಆಗಿರುವ ವೀಡಿಯೊ ಬಿಹಾರದಲ್ಲಿ ನಡೆಯುತ್ತಿರುವ ‘ಮತದಾರ ಅಧಿಕಾರ ಯಾತ್ರೆ’ಗೆ ಸಂಬಂಧಿಸಿಲ್ಲ ಎಂದು ನಾವು ಖಚಿತಪಡಿಸಬಹುದು, ಏಕೆಂದರೆ ಇದು ಆಗಸ್ಟ್ 17, 2025 ರಂದು ರಾಹುಲ್ ಗಾಂಧಿಯವರ ಪಾದಯಾತ್ರೆಯನ್ನು ಪ್ರಾರಂಭಿಸುವ ಮೊದಲೇ  ಇದು ಆನ್‌ಲೈನ್‌ನಲ್ಲಿ ಲಭ್ಯವಿತ್ತು.

ಹೆಚ್ಚಿನ ಹುಡುಕಾಟವು ನಮ್ಮನ್ನು ಜೂನ್ 23, 2025 ರಂದು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ಇದೇ ರೀತಿಯ ದೃಶ್ಯಗಳನ್ನು ಹೊಂದಿರುವ ಮತ್ತೊಂದು ವೀಡಿಯೊಗೆ ನಮ್ಮನ್ನು ಕರೆದೊಯ್ಯಿತು. ಈ ವೀಡಿಯೊದ ಶೀರ್ಷಿಕೆಯು ಮಹಾರಾಷ್ಟ್ರದಲ್ಲಿ ನಡೆದ ಎತ್ತಿನ ಗಾಡಿ ಓಟಕ್ಕೆ ಸಂಬಂಧಿಸಿದ ದೃಶ್ಯಗಳು ಎಂದು ತಿಳಿಸಿವೆ. ನಂತರ ನಾವು ಸಂಬಂಧಿತ ಕೀವರ್ಡ್ ಹುಡುಕಾಟವನ್ನು ನಡೆಸಿದಾಗ ವೈರಲ್ ವೀಡಿಯೊದಲ್ಲಿರುವ ದೃಶ್ಯಗಳಿಗೆ ಹೋಲುವ ದೃಶ್ಯಗಳನ್ನು ತೋರಿಸುವ ಹಲವಾರು ವೀಡಿಯೊಗಳನ್ನು (ಇಲ್ಲಿ, ಇಲ್ಲಿ ಮತ್ತು ಇಲ್ಲಿ)ಇನ್‌ಸ್ಟಾಗ್ರಾಮ್‌ನಲ್ಲಿ ಕಂಡುಬಂದಿದೆ. ಇವುಗಳ ಪ್ರಕಾರ, ವೈರಲ್ ವೀಡಿಯೊ ಮಹಾರಾಷ್ಟ್ರದ ಸತಾರಾದ ಪೆಡಗಾಂವ್‌ನಲ್ಲಿರುವ ಹಿಂದ್‌ಕೇಸರಿ ಮೈದಾನದಲ್ಲಿ ಆಯೋಜಿಸಲಾದ ಎತ್ತಿನ ಗಾಡಿ ಓಟಕ್ಕೆ ಸಂಬಂಧಿಸಿದೆ. 

ವೈರಲ್ ವೀಡಿಯೊವನ್ನು ಸೂಕ್ಷ್ಮವಾಗಿ ಗಮನಿಸಿದಾಗ, ಇಲ್ಲಿನ ಕೆಲ ಜನರು ಬುಲ್ ಚಿತ್ರವಿರುವ ಟಿ-ಶರ್ಟ್‌ಗಳನ್ನು ಧರಿಸಿರುವುದನ್ನು ನಾವು ಕಾಣಬಹುದು. 

ನಂತರ ನಾವು ಮಹಾರಾಷ್ಟ್ರದ ಸತಾರಾದ ಪೆಡಗಾಂವ್‌ನಲ್ಲಿರುವ ಹಿಂದ್‌ಕೇಸರಿ ಮೈದಾನವನ್ನು ಜಿಯೋಲೊಕೇಶನ್ ನಲ್ಲಿ ನೋಡಿದ್ದೇವೆ.  ಜೂನ್ 2025 ರಲ್ಲಿ ಗೂಗಲ್ ಸ್ಟ್ರೀಟ್ ವ್ಯೂ ಹಿಂದ್‌ಕೇಸರಿ ಮೈದಾನದ ಚಿತ್ರಣಕ್ಕೆ ಅಪ್‌ಲೋಡ್ ಮಾಡಲಾದ ಫೋಟೋವನ್ನು ಕಂಡುಕೊಂಡಿದ್ದು, ಅದು ವೈರಲ್ ವೀಡಿಯೊದಲ್ಲಿ ಕಂಡುಬರುವ ದೃಶ್ಯಗಳಿಗೆ ಹೊಂದಿಕೆಯಾಗುತ್ತದೆ.

ಮಹಾರಾಷ್ಟ್ರದ ಸತಾರಾದ ಪೆಡಗಾಂವ್‌ನಲ್ಲಿ ನಡೆದ ಎತ್ತಿನಗಾಡಿ ಓಟದ ಆಯೋಜಕರಲ್ಲಿ ಒಬ್ಬರನ್ನು ‘ನ್ಯೂಸ್ ಚೆಕರ್‘ ಎಂಬ ಫ್ಯಾಕ್ಟ್ ಚೆಕಿಂಗ್ ಸಂಸ್ಥೆ ಸಂಪರ್ಕಿಸಿತು. ಅದರೊಂದಿಗೆ ಮಾತನಾಡಿದ ಅವರು, ಪೆಡಗಾಂವ್‌ನ ಹಿಂದ್‌ಕೇಸರಿ ಮೈದಾನದಲ್ಲಿ ಆಯೋಜಿಸಲಾದ ಎತ್ತಿನಗಾಡಿ ಓಟದ ವಿಡಿಯೋವನ್ನೇ  ಇಲ್ಲಿ ತೋರಿಸಲಾಗಿದೆ ಎಂದು ದೃಢಪಡಿಸಿದರು. ಈ ಕಾರ್ಯಕ್ರಮವನ್ನು ಜೂನ್ 21, 2025 ರಂದು ನಡೆಸಲಾಗಿದೆ ಎಂದು ತಿಳಿಸಿದ್ದಾರೆ. ಈ ಕಾರ್ಯಕ್ರಮದ ಇತರ ಹಲವು ವೀಡಿಯೊಗಳನ್ನು ನಾವು ಯೂಟ್ಯೂಬ್ ನಲ್ಲಿ (ಇಲ್ಲಿ, ಇಲ್ಲಿ ಮತ್ತು ಇಲ್ಲಿ) ಕಂಡುಕೊಂಡಿದ್ದೇವೆ.

ಸಂಕ್ಷಿಪ್ತವಾಗಿ ಹೇಳುವುದಾದರೆ, ಭಾರಿ ಜನಸಂದಣಿಯನ್ನು ತೋರಿಸುವ ಈ ವೈರಲ್ ವೀಡಿಯೊ ರಾಹುಲ್ ಗಾಂಧಿಯವರ ಬಿಹಾರದಲ್ಲಿ ನಡೆದ ‘ಮತದಾರ ಅಧಿಕಾರ ಯಾತ್ರೆ’ಗೆ ಸಂಬಂಧಿಸಿಲ್ಲ ಬದಲಿಗೆ ಇದು ಮಹಾರಾಷ್ಟ್ರದ ಸತಾರಾದಲ್ಲಿ ನಡೆದ ಎತ್ತಿನಗಾಡಿ ಓಟಕ್ಕೆ ಸಂಬಂಧಿಸಿದೆ.