1925 నుంచి 1947 మధ్య కాలంలో రాష్ట్రీయ స్వయంసేవక్ సంఘ్ (ఆర్‌ఎస్‌ఎస్‌) బ్రిటిష్ వ్యతిరేక ఉద్యమంలో పాల్గొనలేదని బ్రిటిష్ హోం డిపార్ట్‌మెంట్ పేరుతో ఉన్న ఒక పత్రం (ఇక్కడ, ఇక్కడ & ఇక్కడ) సోషల్ మీడియాలో ప్రచారంలో ఉంది. దీంట్లో ఎంత నిజముందో ఇప్పుడు చూద్దాం.
క్లెయిమ్: 1925 నుంచి 1947 మధ్య కాలంలో ఆర్‌ఎస్‌ఎస్‌ బ్రిటిష్ వ్యతిరేక ఉద్యమంలో పాల్గొనలేదని బ్రిటిష్ హోం డిపార్ట్‌మెంట్ పేరుతో ఉన్న పత్రం.
ఫాక్ట్: ఇది ఒక నకిలీ పత్రం. బ్రిటిష్ హోం డిపార్ట్‌మెంట్ ఇటువంటి పత్రాన్ని విడుదల చేసినట్లు ఆధారాలు లేవు. కావున పోస్టులో చేయబడిన క్లెయిమ్ తప్పు.
ముందుగా బ్రిటిష్ హోం డిపార్ట్‌మెంట్ (లేదా హోం ఆఫీస్) ఈ పత్రాన్ని ప్రచురించినట్లు మాకు ఎటువంటి జాతీయ, అంతర్జాతీయ వార్తా కథనాలు లభించలేదు. బ్రిటిష్ పాలన నాటి డాక్యుమెంట్లు కలిగి ఉండే నేషనల్ ఆర్కైవ్స్ వంటి వెబ్‌సైట్లలో కూడా ఈ పత్రం అందుబాటులో లేదు.
ఇక వైరల్ పత్రాన్ని పరిశీలించగా, ఇందులో ఉన్న చిహ్నం అధికారిక రాయల్ కోట్ ఆఫ్ ఆర్మ్స్ చిహ్నాలకి (ఇక్కడ, ఇక్కడ & ఇక్కడ) భిన్నంగా ఉండడం గుర్తించాం. వైరల్ పత్రంలో ఉన్న చిహ్నంలోని అక్షరాలు అధికారిక చిహ్నంలో ఉన్న అక్షరాలతో పోలిస్తే వేరుగా ఉన్నాయి. వైరల్ పత్రంలో ఇవ్వబడిన చిహ్నాలు రెండూ కూడా భిన్నంగా ఉన్నాయి.
ఇక, వైరల్ పత్రంలో ఉన్న మౌంట్‌బాటన్ సంతకం కూడా 1978లో తన సహోద్యోగికి రాసిన లేఖ నుంచి తీసుకున్నట్లుగా గుర్తించాం. ఈ లేఖలోని అక్షరాలు వైరల్ పోస్టులో కూడా ఉండడం చూడవచ్చు. దీన్ని బట్టి, ఈ లేఖని మార్ఫ్ చేసి వైరల్ పత్రాన్ని సృష్టించినట్లు తెలుస్తుంది.
అలాగే, వైరల్ పత్రాన్ని ముందుగా షేర్ చేసిన ప్రజ్ఞ గుప్తా అనే X (ట్విట్టర్) యూసర్ దీనిపై వివరణ ఇస్తూ, ఇది బ్రిటిష్ పాలన సమయంలో జరిగిన సంఘటనల ఆధారంగా రూపొందించిన కల్పిత పత్రం అని వెల్లడించారు.
చివరిగా, బ్రిటిష్ వ్యతిరేక ఉద్యమంలో ఆర్‌ఎస్‌ఎస్‌ పాల్గొనలేదని బ్రిటిష్ హోం డిపార్ట్‌మెంట్ పేరుతో ప్రచారంలో ఉన్న ఈ పత్రం ఫేక్.
