ಲೆಫ್ಟಿನೆಂಟ್ ಜನರಲ್ ರಾಜೀವ್ ಘಾಯಿಯವರ ವಿಡಿಯೋ (ಇಲ್ಲಿ) ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಈ ವಿಡಿಯೋದಲ್ಲಿ, ಅವರು “ಕೇಸರಿ ರಾಜಕಾರಣ” ಮತ್ತು “ಧಾರ್ಮಿಕ ಧ್ರುವೀಕರಣ”ದ ಹೆಚ್ಚುತ್ತಿರುವ ಪ್ರಭಾವವನ್ನು ಟೀಕಿಸಿದ್ದಾರೆ. ಈ ಅಂಶಗಳು ಭಾರತೀಯ ಸೇನೆಯ ಮೂಲಭೂತ ಮೌಲ್ಯಗಳನ್ನು ಸವೆಸುತ್ತಿವೆ ಎಂದು ಅವರು ಆರೋಪಿಸಿದ್ದಾರೆ ಎನ್ನಲಾಗಿದೆ. ವಿಡಿಯೋದಲ್ಲಿ, ರಾಜಕೀಯ ಸಿದ್ಧಾಂತವು ಸೇನೆಯ ಶಿಸ್ತು, ಏಕತೆ ಮತ್ತು ಸಾಂವಿಧಾನಿಕ ಕರ್ತವ್ಯವನ್ನು ದುರ್ಬಲಗೊಳಿಸುತ್ತಿದೆ ಎಂದು ಅವರು ಹೇಳುತ್ತಿರುವುದು ಕೇಳಿಬರುತ್ತಿದೆ ಎನ್ನಲಾಗಿದೆ. ಈ ವೈರಲ್ ವಿಡಿಯೋದ ಹಿಂದಿನ ಸತ್ಯವನ್ನು ತಿಳಿದುಕೊಳ್ಳೋಣ.
ಕ್ಲೇಮ್: ಈ ವಿಡಿಯೋದಲ್ಲಿ ಉಪ ಸೇನಾ ಮುಖ್ಯಸ್ಥರಾದ ಲೆಫ್ಟಿನೆಂಟ್ ಜನರಲ್ ರಾಜೀವ್ ಘಾಯಿಯವರು, ಭಾರತೀಯ ಸೇನೆಯಲ್ಲಿ ಹೆಚ್ಚುತ್ತಿರುವ ಕೇಸರಿ ರಾಜಕಾರಣ ಮತ್ತು ಧಾರ್ಮಿಕ ಧ್ರುವೀಕರಣದ ಪ್ರಭಾವವನ್ನು ಟೀಕಿಸಿದ್ದಾರೆ ಎಂದು ತೋರಿಸುತ್ತದೆ.
ಫ್ಯಾಕ್ಟ್: ಈ ವಿಡಿಯೋ ಒಂದು ಡೀಪ್‌ಫೇಕ್ ಆಗಿದೆ. 2025 ರ ಅಕ್ಟೋಬರ್ 18 ರಂದು ರಿಪಬ್ಲಿಕ್ ಟಿವಿ ನೇರ ಪ್ರಸಾರ ಮಾಡಿದ ಒರಿಜಿನಲ್ ಭಾಷಣದಲ್ಲಿ, ಲೆಫ್ಟಿನೆಂಟ್ ಜನರಲ್ ಘಾಯಿಯವರು ರಾಜಕೀಯ ಅಥವಾ ಧರ್ಮದ ಬಗ್ಗೆ ಅಲ್ಲದೆ, ಭಾರತದ ರಕ್ಷಣಾ ಸಿದ್ಧತೆ ಮತ್ತು ಕಾರ್ಯತಂತ್ರದ ಸಿದ್ಧಾಂತಗಳ ಕುರಿತು ಚರ್ಚಿಸುತ್ತಿದ್ದರು. ಹೈವ್ ಮತ್ತು ವಾಯ್ಸ್ ಡಿಟೆಕ್ಟರ್ ರಸಂಬಲ್ ನಂತಹ AI ಪತ್ತೆ ಸಾಧನಗಳು, ಬಳಸಿ ಈ ವೈರಲ್ ವಿಡಿಯೋವನ್ನು ಕೃತಕವಾಗಿ ಸೃಷ್ಟಿಸಲಾಗಿದೆ ಮತ್ತು ಅದರ ಧ್ವನಿಯನ್ನು ಬದಲಾಯಿಸಲಾಗಿದೆ ಎಂದು ದೃಢಪಡಿಸಿವೆ. ಆದ್ದರಿಂದ, ಈ ಕ್ಲೇಮ್ ಸುಳ್ಳು.
ಈ ಕ್ಲೇಮ್ ಪರಿಶೀಲಿಸಲು, ನಾವು ಗೂಗಲ್‌ನಲ್ಲಿ ರಿವರ್ಸ್ ಇಮೇಜ್ ಸರ್ಚ್ ಅನ್ನು ನಡೆಸಿದೆವು. ಇದು ಲೆಫ್ಟಿನೆಂಟ್ ಜನರಲ್ ರಾಜೀವ್ ಘಾಯಿಯವರ ಒರಿಜಿನಲ್ ಭಾಷಣಕ್ಕೆ ನಮ್ಮನ್ನು ಕರೆದೊಯ್ಯಿತು, ಅದು 2025 ರ ಅಕ್ಟೋಬರ್ 18 ರಂದು ರಿಪಬ್ಲಿಕ್ ಟಿವಿಯ ಯೂಟ್ಯೂಬ್ ಚಾನೆಲ್‌ನಲ್ಲಿ ನೇರ ಪ್ರಸಾರವಾಗಿತ್ತು. ನೇರ ಪ್ರಸಾರದಲ್ಲಿ ಕಾಣುವ ಉಡುಪು ಮತ್ತು ಹಿನ್ನೆಲೆಯು ವೈರಲ್ ಕ್ಲಿಪ್‌ನಲ್ಲಿ ಕಾಣುವವರೊಂದಿಗೂ ಹೊಂದಿಕೆಯಾಗುತ್ತದೆ.
ರಿಪಬ್ಲಿಕ್‌ನ ‘ಫೋರ್ಸಸ್ ಫಸ್ಟ್ ಕಾನ್‌ಕ್ಲೇವ್’ ನಲ್ಲಿ ಮಾಡಿದ ತಮ್ಮ ಭಾಷಣದ ಸಂದರ್ಭದಲ್ಲಿ, ಲೆಫ್ಟಿನೆಂಟ್ ಜನರಲ್ ಘಾಯಿಯವರು ಭವಿಷ್ಯದ ಸಂಘರ್ಷಗಳಿಗೆ ಭಾರತದ ಸನ್ನದ್ಧತೆಯ ಬಗ್ಗೆ ಚರ್ಚಿಸಿದರು. ಅವರು ಆಪರೇಷನ್ ಸಿಂಧೂರ್ ಅನ್ನು ಉಲ್ಲೇಖಿಸಿ, ಇದು ನಿಖರತೆ ಮತ್ತು ಬಹು-ಕ್ಷೇತ್ರದ ಯುದ್ಧಕ್ಕೆ (multi-domain warfare) ಪ್ರಮುಖ ಉದಾಹರಣೆಯಾಗಿದ್ದು, ಉದ್ವಿಗ್ನತೆಯ ನಿಯಂತ್ರಣವನ್ನು ಕಾಯ್ದುಕೊಂಡಿದೆ ಎಂದು ವಿವರಿಸಿದರು. ಅಲ್ಲದೆ, ಸಂಯೋಜಿತ ಥಿಯೇಟರ್ ಕಮಾಂಡ್‌ಗಳ (Joint Theatre Commands), ತಂತ್ರಜ್ಞಾನ-ಚಾಲಿತ ಯುದ್ಧತಂತ್ರಗಳು, ಮತ್ತು ತಪ್ಪು ಮಾಹಿತಿ ಹರಡುವುದನ್ನು ತಡೆಯುವ ಪ್ರಾಮುಖ್ಯತೆಯನ್ನು ಒತ್ತಿ ಹೇಳಿದರು. ಇದಕ್ಕಿಂತ ಹೆಚ್ಚಾಗಿ, ಅವರು ಪಾಕಿಸ್ತಾನದ ” ನೋ ವಾರ್” ಎಂಬ ನಿಲುವನ್ನು ಕೇವಲ ಬೊಗಳೆ ಎಂದು ಎಂದು ತಿಳಿಸಿ, ಭಾರತದ ದೃಢ ಸಂಕಲ್ಪ, ಸಮಂಜಸತೆ ಮತ್ತು ಕಾರ್ಯತಂತ್ರದ ಸಾರ್ವಭೌಮತ್ವದ ಸಿದ್ಧಾಂತವನ್ನು ಒತ್ತಿ ಹೇಳಿದರು. ಅವರ ಭಾಷಣದಲ್ಲಿ ಎಲ್ಲೂ “ಕೇಸರಿ ರಾಜಕಾರಣ” ವನ್ನು ಪ್ರಸ್ತಾಪಿಸಲಿಲ್ಲ, ಅಥವಾ ವೈರಲ್ ವಿಡಿಯೋದಲ್ಲಿ ಕೇಳಿಬಂದಂತಹ ಯಾವುದೇ ಹೇಳಿಕೆಗಳನ್ನು ನೀಡಲಿಲ್ಲ.
ವೈರಲ್ ವಿಡಿಯೋವನ್ನು ಮೂಲ ಭಾಷಣದೊಂದಿಗೆ ಹೋಲಿಸಿದಾಗ, ರಾಜೀವ್ ಘಾಯಿಯವರ ಧ್ವನಿಯು ಭಾಗಶಃ ಹೋಲಿಕೆ ಕಂಡರೂ, ಧ್ವನಿಯ ರೀತಿ , ಲಯ ಮತ್ತು ಮಾತಿನ ಶೈಲಿಯು ಅಧಿಕೃತ ವಿಡಿಯೋಕ್ಕಿಂತ ಗಮನಾರ್ಹವಾಗಿ ಭಿನ್ನವಾಗಿದೆ. ವೈರಲ್ ಕ್ಲಿಪ್ ಡೀಪ್‌ಫೇಕ್ ಆಗಿದೆಯೇ ಎಂದು ಪರಿಶೀಲಿಸಲು, ನಾವು ಹೈವ ಮತ್ತು ವಾಯ್ಸ್ ಡಿಟೆಕ್ಟರ್ ರಸಂಬಲ್ ನಂತಹ AI ಪತ್ತೆ ಸಾಧನಗಳನ್ನು ಬಳಸಿಕೊಂಡು ಅದನ್ನು ಪರಿಶೀಲಿಸಿದೆವು. ಈ ಎರಡೂ ಸಾಧನಗಳು ವಿಡಿಯೋ AI ಯಿಂದ ರಚನೆಯಾಗಿರುವ ಹೆಚ್ಚಿನ ಸಾಧ್ಯತೆಯಿದೆ ಮತ್ತು ಧ್ವನಿಯನ್ನು AIಯನ್ನು ಬಳಸಿ ಮಾರ್ಪಡಿಸಲಾಗಿದೆ ಎಂದು ಸೂಚಿಸಿವೆ. ಇದು ವೈರಲ್ ಕ್ಲಿಪ್ ಒಂದು ಡೀಪ್‌ಫೇಕ್ ಎಂಬುದನ್ನು ದೃಢಪಡಿಸುತ್ತದೆ.
ಪಿಐಬಿ (PIB) ಫ್ಯಾಕ್ಟ್ ಚೆಕಿಂಗ್ ಘಟಕವೂ ಸಹ ಇದು ಡೀಪ್‌ಫೇಕ್ ಎಂದು ದೃಢಪಡಿಸಿ, ಈ ಕುರಿತು ಪೋಸ್ಟ್ ಮಾಡಿದೆ.
ಒಟ್ಟಾರೆಯಾಗಿ ಹೇಳುವುದಾದರೆ, ಲೆಫ್ಟಿನೆಂಟ್ ಜನರಲ್ ರಾಜೀವ್ ಘಾಯಿಯವರು ಕೇಸರಿ ರಾಜಕಾರಣವನ್ನು ಟೀಕಿಸಿದ್ದಾರೆ ಎನ್ನಲಾದ ವೈರಲ್ ವಿಡಿಯೋವು, ಅವರ ಧ್ವನಿ ಮತ್ತು ಸಂದೇಶವನ್ನು ಬದಲಾಯಿಸಲು AI ಬಳಸಿ ಸೃಷ್ಟಿಸಿದ ಡೀಪ್ ಫೇಕ್ ವಿಡಿಯೋ ಎಂದು ಹೇಳಬಹುದು.
