ఇరాన్లో స్త్రీలను రోడ్డు పక్కన అమ్ముతున్న దృశ్యాలని చెప్తూ ఒక నాటక ప్రదర్శన వీడియోను షేర్ చేస్తున్నారు
ఒక రోడ్డు పక్కన కొందరు బుర్ఖా ధరించిన మహిళల నఖాబ్ను (ముసుగును) ఒక వ్యక్తి తీసి చూస్తున్న వీడియో (ఇక్కడ, ఇక్కడ) ఒకటి సోషల్ మీడియాలో షేర్ చేయబడుతోంది. ఆ మహిళలందిరి చేతులకు గొలుసులు వేసి ఉండటం మనం ఈ వీడియోలో చూడవచ్చు. ‘ఆ బురఖా తీసివేసి ధర చెప్పు…😩 దీన్ని కొనడానికి ఇష్టపడే కస్టమర్ ఎవరైనా ఉన్నారా లేదా? 😵💫 ..’ అని ఉన్న ఈ పోస్టు యొక్క వివరణ, మహిళలను కొనుక్కునే (కొనుగోలు చేసే) ఒక మార్కెట్ లాంటి ప్రదేశంలో ఈ వీడియోను చిత్రించారని సూచిస్తుంది. ఈ వీడియో ఇరాన్ దేశంలో తీసిందని, ఈ పోస్టు వివరణలో ఉంది. అసలు, ఈ క్లెయిమ్ వెనుక ఎంత నిజం ఉందో ఈ ఆర్టికల్ ద్వారా చూద్దాం.
క్లెయిమ్: ఇరాన్లో స్త్రీలను కొనుగోలు చేసే ఒక మార్కెట్లో తీసిన వీడియో.
ఫ్యాక్ట్(నిజం): ఈ వీడియో ఆర్యన్ రఫీక్ అనే కుర్దిష్ కళాకారిణి డైరెక్ట్ చేసిన ఒక ఆర్ట్ ప్రదర్శనను (drama) చూపిస్తుంది, ఇరాన్లో స్త్రీలను అమ్ముతున్న నిజమైన మార్కెట్ను కాదు. ఐసిస్ (ISIS) చేత కిడ్నాప్ చేయబడి, బానిసలుగా అమ్మబడిన మహిళల దుస్థితిని ఈ వీధి నాటకం చూపిస్తుంది. కావున, ఈ పోస్టులో చేస్తున్న క్లెయిమ్ తప్పు.
ఈ క్లెయిమ్ వెనుక ఉన్న నిజానిజాలు తెలుసుకోవడానికి, వైరల్ వీడియోలోని కొన్ని కీఫ్రేమ్స్ ఉపయోగించి ఇంటర్నెట్లో ఒక రివర్స్ ఇమేజ్ సెర్చ్ చేశాము. ఈ సెర్చ్ ద్వారా, ఈ వీడియోలో కనిపించే దృశ్యాలను పోలి ఉన్న వీడియో ఒకటి మాకు టిక్-టాక్లో లభించింది. ఇది ఆర్యన్ రఫీక్ అనే ఆర్టిస్ట్ యొక్క “The Unheard Screams Of The Ezidkhan Angel” అనే ఆర్ట్ పెర్ఫార్మన్స్ అని ఈ పోస్టు యొక్క వివరణలో ఉంది.
బెల్జియన్ పార్లమెంట్ సభ్యురాలు ధర్యా సఫాయి, ఇదే వీడియోను, ఐసిస్ నడుపుతున్న లైంగిక బానిసల (sex-slaves) మార్కెట్ దృశ్యాలని చెప్తూ మే 2023లో ‘X’లో షేర్ చేసినప్పుడు, అనేక మీడియా సంస్థలు తన ట్వీట్కు స్పందించి, ఈ వీడియో ఇరాక్లో ఐసిస్ ఉన్న సమయంలో మహిళల బానిసత్వాన్ని చూపిస్తూ చేసిన ఒక ప్రదర్శనకు చెందినదని చెప్పాయని మాకు తెలిసింది.
ఈ సమాచారాన్ని క్లూగా తీసుకొని, తగిన కీవర్డ్స్ ఉపయోగించి ఇంటర్నెట్లో వెతకగా, ఆర్యన్ రఫీక్ యొక్క ఫేస్బుక్ పేజీ మాకు కనిపించింది. అందులో “The Unheard Screams Of The Ezidkhan Angels” కళా ప్రదర్శన (art performance/drama) గురించి ఆమె చేసిన ఒక పోస్ట్ కనిపించింది. ఆర్యన్ రఫీక్ ఒక కుర్దిష్ కళాకారిణి. ఆమె 8 మార్చి 2023న చేసిన ఈ ఫేస్బుక్ పోస్ట్లో, తన “The Unheard Screams Of The Ezidkhan Angels” నాటకం యొక్క ప్రదర్శన ఇరాక్లో ఉన్న ఎర్బిల్ సిటాడెల్ సమీపంలోని ఎర్బిల్-పార్కి షార్ అనే ప్రదేశంలో జరగనుందని చెప్తూ, దీన్ని చూడడానికి ప్రజలకు ఆహ్వానం పలికారు.
ఈ వీడియో గురించి VRT న్యూస్తో ఆర్యన్ రఫీక్ మాట్లాడుతూ, ఈ వీడియో తను చేసిన ఒక కళా ప్రదర్శన (art performance/drama) అని ధృవీకరించారు. ఐసిస్ (ISIS) చేత కిడ్నాప్ చేయబడి, బానిసలుగా అమ్ముడుపోయిన మహిళల దుస్థితి గురించి చేసిన ఒక పెద్ద ప్రదర్శనకు సంబంధించిన ఒక చిన్న భాగమే ఈ వీడియో అని ఆర్యన్ రఫీక్ వారితో అన్నారు.
గతంలో ఇదే వీడియో సిరియాలో ఐసిస్(ISIS) వారు నడుపుతున్న ఒక స్లేవ్ మార్కెట్ను చూపిస్తుందని చెప్పి సోషల్ మీడియాలో వైరల్ అయినప్పుడు, ఆ క్లెయిమ్ తప్పు అని చెప్తూ ఫ్యాక్ట్లీ ఒక కథనాన్ని పబ్లిష్ చేసింది.
చివరగా, ఇరాన్లో స్త్రీలను రోడ్డు పక్కన వేలం వేస్తున్న దృశ్యాలు అని చెప్తూ ఒక నాటక ప్రదర్శన వీడియోను తప్పుగా షేర్ చేస్తున్నారు.