గత సంవత్సరం కేరళలో CAA & NRCలకి వ్యతిరేకంగా జరిగిన నిరసనల వీడియోని త్రిపుర మత ఘర్షణలకు ముడిపెడుతూ షేర్ చేస్తున్నారు

• Chaitanya

ఇటీవల త్రిపురలో మత ఘర్షణలు జరిగిన నేపథ్యంలో త్రిపుర ముస్లింలకు మద్దతుగా కేరళ ముస్లింలు ర్యాలీ నిర్వహించారంటూ ఒక వీడియోని షేర్ చేసిన పోస్ట్ ఒకటి సోషల్ మీడియాలో వైరల్ అవుతుంది. ఈ కథనం ద్వారా అందులో ఎంత నిజముందో చూద్దాం.

క్లెయిమ్: త్రిపుర ముస్లింలకు మద్దతుగా కేరళలోని ముస్లింలు నిర్వహించిన ర్యాలీకి సంబంధించిన వీడియో.

ఫాక్ట్ (నిజం): ఈ వీడియో జనవరి 2020లో కేరళలోని మనర్కాడ్‌లో CAA & NRCకి వ్యతిరేకంగా జరిగిన నిరసనలకు సంబంధించింది. ఈ వీడియోని పలు మలయాళీ వార్తా సంస్థలు కూడా గత సంవత్సరం రిపోర్ట్ చేసాయి. ఈ వీడియోకి ఇటీవల త్రిపురలో జరిగిన మత ఘర్షణలకు ఎటువంటి సంబంధంలేదు. కావున పోస్టు ద్వారా చెప్పేది తప్పు.

వైరల్ అవుతున్న ఈ వీడియోకి సంబంధించిన స్క్రీన్ షాట్స్‌ని రివర్స్ ఇమేజ్ సెర్చ్ చేయగా వైరల్ అవుతున్న వీడియో యొక్క ఎక్కువ నిడివిగల వెర్షన్ షేర్ చేసిన ఒక ఇన్‌స్టాగ్రామ్‌ పోస్టు మాకు కనిపించింది. ఈ వీడియోని 03 జనవరి 2020న షేర్ చేయగా, పోస్టులో పేర్కొన్న హ్యాష్‌ట్యాగ్‌ల (#rejectnrc #rejectcaa #Mannarkkad) ప్రకారం వీడియోలోని విజువల్స్ కేరళలోని మనర్కాడ్‌లో గత సంవత్సరం జరిగిన CAA & NRC వ్యతిరేక నిరసనలకు సంబంధించిందని అర్ధమవుతుంది.

అలాగే వీడియోలో నిరసనకారులు ప్రదర్శించిన బ్యానర్‌పై ‘Constitutional Protection Rally’ మరియు ‘03 January 2020’ అని రాసి ఉండడం చూడొచ్చు.

పైగా ఇన్‌స్టాగ్రామ్‌ వీడియోలో 9:55 -10:27 టైంలో నిరసనకారులు ఒక అంబులన్స్‌కి దారి ఇవ్వడం చూడొచ్చు. ఈ వీడియోకి సంబంధించిన వార్తా కథనాల కోసం వెతికినప్పుడు, నిరసనకారులు అంబులన్స్‌కి దారిచ్చిన ఈ ఘటనను రిపోర్ట్ చేసిన మలయాళీ వార్తా కథనం మాకు కనిపించింది. ఈ కథనం జనవరి 2020లో ప్రచురించగా, కథనంలో చెప్తున్నదాని ప్రకారం ఈ ఘటన పాలక్కడ్‌లోని మనర్కాడ్‌లో CAA & NRC వ్యతిరేకంగా నిరసనలు చేస్తున్నప్పుడు జరిగింది. దీన్నిబట్టి వైరల్ అవుతున్న వీడియో 2020లో కేరళలో CAA & NRCకి వ్యతిరేకంగా జరిగిన నిరసనలకు సంబంధించిందని, ఈ వీడియోకి ఇటీవల త్రిపురలో జరిగిన మత ఘర్షణలకు ఎటువంటి సంబంధంలేదని స్పష్టమవుతుంది.

మనర్కాడ్‌ లైవ్ అనే యూట్యూబ్‌ ఛానల్‌లో వైరల్ అవుతున్న వీడియోకి సంబంధించిన ఇంకొక వెర్షన్ చూడొచ్చు. ఈ వీడియోలో వైరల్ వీడియో, ఇన్‌స్టాగ్రామ్‌ వీడియోని పోలిన విజువల్స్ చూడొచ్చు. ఐతే ఈ వీడియో వివరణ కూడా ఇది మనర్కాడ్‌లో CAA & NRCకి వ్యతిరేకంగా జరిగిన నిరసనలకు సంబంధించిందనే చెప్తుంది.

చివరగా, గత సంవత్సరం కేరళలో CAA & NRCలకి వ్యతిరేకంగా జరిగిన నిరసనలకు సంబంధించిన వీడియోని త్రిపుర మత ఘర్షణలకు ముడిపెడుతూ షేర్ చేస్తున్నారు.