ఈ వైరల్ వీడియో తిరుమల వెంకటేశ్వర స్వామి ఆలయంపై నేషనల్ జియోగ్రాఫిక్ ఛానల్ చిత్రీకరించిన డాక్యుమెంటరీ దృశ్యాలను చూపించదు

‘‘కేంద్ర ప్రభుత్వ అనుమతితో నేషనల్ జియోగ్రాఫిక్ ఛానల్ చిత్రీకరించిన ఆంధ్రప్రదేశ్‌లోని తిరుపతి బాలాజీ ఆలయ దృశ్యాలను చూపిస్తున్న వీడియో ఇది’’ అంటూ పోస్ట్ ఒకటి సోషల్ మీడియాలో వైరల్ అవుతోంది (ఇక్కడ, ఇక్కడ, & ఇక్కడ). అలాగే, ఇదే వీడియోను షేర్ చేస్తూ ‘‘ఈ వీడియోను నిజంగా నేషనల్ జియోగ్రాఫిక్ ఛానల్ చిత్రీకరించిందా? లేదా? అని నిర్థారించాలని కోరుతూ మా వాట్సాప్‌ టిప్‌లైన్‌కు (+91 9247052470) కూడా పలు అభ్యర్ధనలు వచ్చాయి. ఈ కథనం ద్వారా అందులో ఎంత నిజముందో చూద్దాం.

ఈ పోస్ట్ యొక్క ఆర్కైవ్డ్ వెర్షన్ ఇక్కడ చూడవచ్చు.

క్లెయిమ్: కేంద్ర ప్రభుత్వ అనుమతితో నేషనల్ జియోగ్రాఫిక్ ఛానల్ చిత్రీకరించిన ఆంధ్రప్రదేశ్‌లోని తిరుపతి బాలాజీ ఆలయ దృశ్యాలు.

ఫాక్ట్(నిజం):  ఈ వైరల్ వీడియోను నేషనల్ జియోగ్రాఫిక్ ఛానల్ చిత్రీకరించలేదు. ఈ వైరల్ వీడియోలోని దృశ్యాలు2017లో తిరుమల తిరుపతి దేవస్థానాల ఆధీనంలో పనిచేసే శ్రీ వెంకటేశ్వర భక్తి ఛానల్‌ (SVBC-TTD) విడుదల చేసిన ఓ వీడియో నుంచి తీసుకున్నవి. కావున పోస్టు ద్వారా చెప్పేది తప్పుదోవ పట్టించే విధంగా ఉంది.

ఈ వైరల్ వీడియోకు సంబంధించిన సమాచారం కోసం, ఈ వీడియో యొక్క కీఫ్రేములను రివర్స్ ఇమేజ్ సెర్చ్ చేయగా, ఇవే దృశ్యాలను కలిగి ఉన్న వీడియోను SVBC TTD అధికారిక యూట్యూబ్ ఛానల్‌లో 02 జూన్ 2017న షేర్ చేసినట్లు కనుగొన్నాము. శ్రీ వెంకటేశ్వర భక్తి ఛానల్ – తిరుమల తిరుపతి దేవస్థానం (SVBC-TTD) అనే ఈ భక్తి ఛానల్ తిరుమల తిరుపతి దేవస్థానం ద్వారా నిర్వహించబడుతుందని మాకు తెలిసింది.

నేషనల్ జియోగ్రాఫిక్ ఛానల్ ‘ఇన్‌సైడ్ తిరుమల తిరుపతి’ పేరుతో తిరుమల ఆలయంపై ఒక ప్రత్యేక డాక్యుమెంటరీని రూపొందించింది. ఈ డాక్యుమెంటరీలో ఆలయం యొక్క రోజువారీ కార్యకలాపాలు, బ్రహ్మోత్సవాలను చూపించారు. దీనిని దాదాపు ఒక సంవత్సరం పాటు చిత్రీకరించారు. అయితే, ఈ డాక్యుమెంటరీలో గర్భగుడిలోని శ్రీ వెంకటేశ్వర స్వామిని చూపించలేదు. ఆ దృశ్యాల కోసం గర్భగుడిని పోలిన నమూనా ఆలయాన్ని నిర్మించి అందులో చిత్రీకరించారు.

చివరిగా, ఈ వైరల్ వీడియోలోని దృశ్యాలు తిరుమల వెంకటేశ్వర స్వామి ఆలయంపై నేషనల్ జియోగ్రాఫిక్ ఛానల్ రూపొందించిన డాక్యుమెంటరీకి సంబంధించినవి కావు.